Það er meira hvað ég er orðin mikill Idol aðdáandi allt í einu, en þetta er alveg magnað sjónvarpsefni! Það er eitthvað við hana Ylfu sem greip mig, var bara alltaf spennt að heyra í henni og fannst flutningur hennar á laginu "When a man loves a woman" alveg æðislegur. En nú er hún dottin út og Helgi Þór líka sem ég fílaði í botn og þá er fátt eitt eftir sem er spennandi. Kannski Davíð Þór, finnst bara meira gaman af þeim sem koma á óvart, þessar prófessional týpur eru svo fyrirséðar og alltaf eins.

Annars eru annarsamir dagar í ömmuhlutverkinu að baki því litli kúturinn fór hálskirtlatöku á fimmtudag og amma passaði hann fyrstu tvo dagana, grey skinnið var ósköp aumur en duglegur. Mamma hans er í nýrri vinnu, sér um blómadreifingu hjá SamaSem og hefur meira en nóg að gera þegar konudagur er framundan. Nú er hann hjá pabba sínum í góðu yfirlæti og lætur dekra við sig.

Við Kalli erum að fara á árshátíð hjá skokkhópnum í kvöld og erum að gramsa í fataskápnum hans Kalla, meira hvað hann er alltaf lengi að kveikja á perunni. Ég er löngu búin að redda mér árshátíðardressi á útsölum, en hann keypti sér veiðistöng í staðinn!

Sit hér við tölvuna að fikta! Er orðin þreytt á því að fylla út atvinnuumsóknir á vefnum út um allt og til í smá fikt!! Rakst á linkinn á þennan blogg-vef og líst bara vel á. Gaman að prufa þetta, tek eftir einu hérna, það er hægt að setja myndir inn beint af tölvunni, bara snilld! Testaði þetta með þessari fallegu "englamynd" af Kalla litla þegar hann var að lúlla hjá afa og ömmu.